政情：葉劉馬國按摩 趁機晒玉腿
立法會議員葉劉淑儀一向保養得宜，佢以前無論係着短褲外遊，定係上電台節目放咗隻腳上台，一雙腿都會引起關注。近日佢又喺社交網站貼相晒腳，見佢坐喺張櫈上大歎腳底按摩，表情相當享受。
葉劉喺貼文話去咗馬來西亞試平民按摩店，約六十蚊半小時，都算便宜。佢又留意到身邊有位全身黑衣打扮嘅女客人，就同按摩師傾起點解來自中東嘅女回教徒，衣着密實到要由頭包到腳，但馬來西亞女回教徒就唔使。按摩師就笑指中東國家嘅丈夫較易呷醋，唔少女士衣着密實到只剩低一對眼，馬來西亞就相對寬鬆喎。
同按摩師傾政治問題
按摩師同葉劉好好傾，仲話當地取消消費稅係馬哈蒂爾新政府嘅德政，全靠佢將前任貪污總理納吉布趕下台，令唔少馬來西亞人民重現希望。連政治問題都傾埋，唔怪得葉劉話今次旅行除咗可以放鬆下，仲增長知識喎！