政情：擬建天價避雨亭 大埔區會嗌減磅
近年唔少政府嘅地區工程都備受爭議，例如喺鰂魚涌嘅「不能避雨亭」、喺柴灣坐唔到嘅「騎呢櫈」等等。最近大埔區議會就傾緊一個天價避雨亭，竟然叫價成六百三十萬元，都夠買層樓啦！該工程本身已經通過咗過百萬嘅前期撥款，但由於唔少議員同埋市民投訴造價太貴，甚至要求暫停工程。早排大埔區議會地區設施管理委員會再次討論，最後顧問公司就被要求提交更多資料，變相係要「減磅」啦！
呢個天價避雨亭係由民建聯區議員黃碧嬌倡議，位於大埔運頭角里嘅一個小山頭，附近仲有間中學。根據區議會文件，避雨亭大約係六十八平方米乘二點五米高，早前通過嘅前期工程費一百零二萬元之中，包括近八十萬元嘅顧問費及廿二萬嘅探井費。當日顧問公司代表喺會上解釋，六百幾萬元仲會包括埋安裝去水喉、照明系統同埋供電箱等等。
叫價630萬 區議員鬧爆冇選擇
不過唔少議員都感到離譜，除咗鬧爆造價貴之外，連工程價格細項分布、設計圖等等文件全部欠奉。其中民主派區議員劉勇威就話，「不能避雨亭」都只係廿萬，依家淨係顧問費都可以整到四個「不能避雨亭」，仲以為自己眼花，睇多咗零添！
連建制派議員都撐唔落，屬新界社團聯會嘅余智榮批評顧問公司應該要畀多啲選擇，例如豪華餐、普通餐或經濟餐咁，唔使郁親就超豪華，嚇親人。佢仲話應該要善用公帑，建議劃細啲個避雨亭添。
黃碧嬌就話喺現場視察過好多次，指依家現有嘅上蓋只係遮鷺鳥糞便，如果起咗個亭，喺落大雨時可以方便家長及學生唔使淋濕。佢仲話已經問過附近嘅持份者，都認為有個亭就最好喇，仲表明唔會撤走方案添。
顧問公司代表就解釋話，因工程未正式做考察，所以依家個價錢係非常唔準確，連估算都稱唔上咁話，事關只係按近期類似項目嘅價錢，同埋工程進行時遇到嘅困難去計，所以係有空間再平啲！民政事務總署代表就澄清，曾經出過幾個設計，但同黃碧嬌傾過，因為遮唔晒，所以先出呢個方案喎。唔知啲議員鬧完之後，天價避雨亭嘅下場又會係點呢？