中環出更：雷雄德聲演項羽 帶兵不懈似克羅地亞隊
「羽之神勇，千古無二。」西楚霸王項羽，屬秦朝末年嘅大英雄，有冇諗過，如果由浸會大學體育學系副教授雷雄德（雷Sir）演出項羽，會唔會變成體育版大英雄呢？社企「好聲」最近推出一本兒童中國歷史發聲書，由雷Sir聲演項羽一角，佢話項羽體力好好，為人似葡萄牙球星基斯坦奴朗拿度（C朗）咁，對教練說話「聽一半唔聽一半」，帶兵就好似克羅地亞球隊，由頭打到落尾永不放棄喎！
雷Sir妙語連珠話，六國丞相蘇秦游說六國合縱之時，使出三招「威逼、恐嚇、利誘」，好適合套用於現今社會生活當中，證明多學歷史好處多，所以鼓勵大家睇多啲書。
鄭泳舜飾蘇秦 囝囝冇興趣聽
聲演蘇秦嘅立法會議員鄭泳舜（Vincent）就笑稱，自己同蘇秦好似，不論遇到咩困難都會團結唔同人，努力去做。佢都有買一套發聲書畀三個仔，溫馨提示「爸爸有份錄（口架）」，點知三個仔揭去蘇秦故事聽咗頭兩句，就話「得喇爸爸，我哋知喇」，然後就轉台去聽曹操等大人物，認真失威喇！
好聲行政總裁陳凱欣就爆料話，Vincent講嘢多懶音，所以圈咗一啲要特別留意發音嘅字畀佢，點知Vincent就真係好留意，結果讀出嚟好生硬，要錄過好幾次至得。例如佢被「國」字考起，成日讀唔正喎！幼兒教育專家孔美琪都有到場，佢大讚發聲書夠晒新穎，令小朋友可以盡早接觸正確歷史，而且有更大嘅想像空間添！
卓妮