出行最驚航班延誤，雖然一般都係延誤半粒鐘或者至多幾粒鐘嘅事，但分分鐘耽誤大事吖嘛。如果你搭乘國泰航空就更加弊傢伙，事關呢間有「因航」之譏嘅航空公司航班延誤當食生菜，甚至可以延誤數十個鐘，問你怕未？
呢，原定上周五夜晚七點幾起飛，由英國曼徹斯特返香港嘅國泰航班最終飛唔成，國泰話係技術故障要維修，仲要係由香港運零件去曼徹斯特做維修，所以要延遲二十七粒鐘至飛得。班乘客已經火都嚟，點知等吓等吓國泰再為乘客送上「驚喜」，話起飛時間要再遲多一日，即係前前後後延遲五十一粒鐘呀陰功，乘客狠批被國泰搞到返唔切香港，返唔到工，見唔到客，打亂晒工作安排，大鬧國泰：「咁大間公司都安排唔到機，有冇搞錯呀！」
係嘅，國泰何止係香港最大嘅航空公司，仲做咗航空公司生意大大話話七十年添，不過空心老倌、不思進取嗰度弊呢。講真，技術故障呢味嘢有邊間航空公司未遇過，其他公司都有一套既定處理手法，唔係派另一架機去接走班乘客，就係將班乘客射去畀其他航空公司，總之務求盡快將乘客送去目的地，咁至係路 （口架）。邊會好似國泰咁，遇到故障就不知所措，連危機應對都冇埋，要班乘客等運到。有乘客被國泰安排轉三次機返港，轉機連交通等候時間，比原定足足遲咗七十二個鐘，鬧爆國泰真係好帶挈。
冇錯，英國啱啱開始放暑假，大把喺當地讀書嘅學生都趕住返香港，搞到機位緊張係事實。不過國泰與其攞呢樣嘢嚟敷衍班乘客，話好難安排乘客轉乘其他航班，倒不如拿拿臨飛架機過去接走班乘客仲好啦，等啲零件由香港運過去再慢慢整，整幾耐唔知，係咪整得番亦話唔埋，隨時班乘客等完五十一粒鐘，又話飛唔到都唔出奇，唔通要啲乘客連份工都辭埋，陪國泰無止境咁等落去咩？
話時話，觀乎國泰嘅往績，店大欺客已經成為常態。就講早前國泰發生機艙行李門故障嗰單嘢吖，搞到乘客落咗機都冇得返屋企，焗住留喺機場等行李；國泰姊妹公司港龍上月一班由泰國布吉飛香港嘅客機延誤十九粒鐘，冇賠償亦冇道歉，唔嬲就假。至於機票超賣當乘客人球咁踢，增加座位縮窄乘客活動空間等等衰嘢，更加數之不盡，最攞命係隨時失驚無神整餐九霄驚魂你歎吖。
昨日因今日果，國泰喺全球最佳航空公司排名由第一跌至家陣阿媽都唔認得絕對咎由自取，不如大家又估吓，幾時跌至倒數第一吖嗱？