政情：馮英倫自爆個名同颱風有關
好多父母為仔女改名都諗爆頭，然而發展局政治助理馮英倫個名就係就地取材，仲同颱風有關添！立法會議員蔣麗芸（Ann）尋日訪問馮，講起佢個名有英倫兩字，唔知係咪因為父母喺英國認識，然後喺嗰度生咗佢？阿Ann諗得好浪漫，但係馮就Say No。
出世撞正愛倫襲港
馮就話好多人都有咁嘅諗法，但事實係佢出生時咁啱打風，就係當年掛十號風球嘅「愛倫」，於是就用咗其中個「倫」字。記得一九八三年愛倫襲港，可謂係超強颱風，十號風球掛咗八個鐘，造成好大傷亡o架！於是阿Ann追問，狂風暴雨下，咪截唔到的士去醫院？馮就笑言好彩當時已經喺醫院嘞！
馮英倫十幾年前讀港大時做過學生會外務副會長，佢話每年嘅學生會都會跟隨當時嘅社會轉變而有唔同，當年就出現咗反釋法、雙普選爭拗，亦剛剛簽訂咗CEPA，所以學生會着重探索香港與內地經濟嘅發展。佢又寄語現時嘅大學生要認識內地，更加要有廣闊嘅國際視野，先可以維持競爭力。