政情：市民寸何俊仁 去邊度睇AV網
好多人都會話「從政人士要比白更白」，有污點就會被講足一世，呢句說話應用喺民主黨（白鴿黨）前立法會議員何俊仁身上，極之貼切。佢從政生涯嘅污點之一，就係曾經喺立法會開會期間用平板電腦瀏覽性感女郎艷照，搞到佢被外界多次取笑為「AV仁」。估唔到事隔多年，尋日喺一個論壇上再被提起，畀市民寸爆佢睇AV添！
香港人對於言論自由，一直都係非常引以為傲，不過就有人屢將「言論自由」與政治議題掛鈎，為人所詬病。尋日嘅論壇上，正係討論言論自由、國家安全等議題，有一位台下觀眾發言時話，言論自由係可以討論，但係必須有邊界，更舉例「我如果問阿仁哥，你平時去邊度睇AV網站」，都會覺得有少少Offensive（冒犯）喇。
論壇上突遭揶揄 何扮聽唔到
呢位仁兄心水清，明白到言論自由唔係擋箭牌，啲人將所有嘢都好似山草藥咁，「噏得就噏」，以為講完無後果，有咩事戴上「自由」頂帽就搞掂。不過呢位仁兄突如其來嘅揶揄，就搞到AV仁面懵懵、頭耷耷，低頭寫字扮聽唔到，又唔敢開口回應。
立法會內睇艷照 成從政污點
AV仁睇性感女郎艷照事件發生於二○一四年，當日政府喺立法會宣讀財政預算案，可能悶得滯，AV仁竟然喺平板電腦上公開睇內地、日本性感模特兒艷照，包括有身穿低胸貼身裙，亦有着三點式泳衣，似乎關心靚女「事業線」更甚於港人未來。除咗浪費納稅人金錢外，仲有網民發現日本一位男優同何俊仁「撞樣」，封佢為「AV仁」，真係醜到要搵窿捐。
佢事後曾致歉，指自己太攰「分咗心」，做咗同議會無關嘅事。白鴿黨更護短，只係譴責及罰款一萬元就算數。AV仁曾經公開承認，睇艷照一事係好「戇居」嘅錯誤，人民不會忘記，又承認呢件事對佢傷害好大，連老婆都嬲埋佢。
AV仁從政多年，早已非政壇新鮮人，相信連佢自己都冇諗過，因為睇艷照幾分鐘嘅快感，卻搞到多年道行一朝喪。似乎市民真係「不會忘記」，就算他日再被寸爆，佢都只會好似「喃嘸佬跌落屎坑」，冇晒符囉！