中環出更：忍足28年 梁富華出書數臭李卓人
工聯會（工記）及職工盟屬工運界兩大巨頭工會，雙方鬥足數十載。曾任勞工界立法會議員嘅前工聯會副會長梁富華最近出書，名為《工人 工會 工棍之我見我評》，話忍足廿八年，退休後決定「做爛仔」，透過出書記錄佢涉足工運界嘅所見所聞，藉此反擊職工盟指控，仲暗指書名中嘅「工棍」正係職工盟秘書長李卓人！
批職工盟得「三道板斧」
梁富華已退休三年零三周，佢話過去數十年被職工盟斥責工記「出賣工人」，偏偏工記採取「打不還手，罵不還口」態度，令佢一直忍氣吞聲。佢曾經同工記人講「你哋做淑女紳士，我去做爛仔反擊」，可惜都被阻止。梁坦言以往做事「揸住老細條頸，冇回應就捏死你」，相反李卓人做事係「捏住老細隻手，問你死未？」批評職工盟郁啲就搞罷工，但又唔夠人，令資方睇死工人「你得咁多人咋」，大幅減弱工人嘅議價能力。
該書列舉唔少案例批評職工盟只得「三道板斧」，包括遊行、包圍資方及喺街頭瞓幾晚等，根本無法解決問題，而且搞包圍行動時，李卓人只會出現半個鐘至一小時，一冇記者就閃人，形容李卓人只想搞大輿論壓力、博出鏡，對行頭、工種及技術一竅不通喎。
卓妮