中環出更：畀學生改花名 祖堯BB唔介意
中文大學前校長沈祖堯在任期間深得學生喜愛，仲被稱為「祖堯BB」。尋日佢出席書展講座時話，開初大家同佢媽媽一樣叫佢「祖堯」先，後來加埋「BB」，一開始都覺得有啲尷尬，後來先發現叫鍾意嘅人做BB，係一種表達親切嘅方式，自己先至欣然接受咋！
雖然受落，不過沈祖堯笑稱，如果喺畢業禮演講等正經場合，就唔適合叫佢做BB啦。依家唔做校長，佢形容好似一條魚跌番落水缸咁自由自在，可以做番研究、教學等，仲有啲年輕人會約佢出嚟食飯，笑指同佢哋成為忘年之交係好難得嘅事喎！
陳百里買成語書當禮物送三歲女
依家大學成日為咗追求排名而要求教授頻頻寫論文，沈話當年有個別老師寫文章一般，但係教學生教得好好，所以佢祭出做校長嘅特權，向相關委員會爭取，如果咁好嘅老師都唔可以留低，以後咪旨意搵到好教師。中大地理與資源管理學系助理教授嚴鴻霖、醫生馬銘賢同中大學生陳敏鎧都有出席同沈對話，而沈嘅太太亦喺台下聽足全場。
書展就到尾聲，卓妮就撞到商務及經濟發展局副局長陳百里，佢話已經去咗三日書展，尋日就抽時間買禮物畀兩個女兒。佢嘅大女得三歲，但已經買本成語書同六歲先啱玩嘅桌上遊戲畀佢，本成語有聞雞起舞、退避三舍及鞠躬盡瘁等成語，嘩，三歲學呢啲？陳百里就強調，本書係圖畫多啲，至於個遊戲就會同阿女一齊玩，訓練兩年應該識喎。聽落咁似怪獸家長嘅？
卓妮