夫中風變植物人 妻撐起頭家遇癌魔

一二年聖誕假日的早上，Cindy原本仍在夢鄉，卻被丈夫的嘔吐聲弄醒，到中醫就診時被指是中風，於是馬上叫白車送入急症室，醫生很快把胡先生確診為面積頗大的出血性中風。老公隨後被轉往病房，怎知這卻是Cindy噩夢的開始。

「第一分鐘去到醫院，我好安心因為好信任，但突然喺一個短嘅時間，將我嘅信任打散不特止，仲驚你唔死再踩多幾腳。」Cindy略帶激動地說。她回憶當時在病房，她不停尋求協助，但無奈病人多醫生少護士忙，六小時後終有醫生來到病床前：「佢就死啦，要即刻同佢做開腦手術。」「老婆，我真係好愛你。」這是當時五十歲的丈夫，最後一句和Cindy說的話。

手術後醫生告訴Cindy，她丈夫有生命危險，即使能救回亦會變成植物人，家屬可以自行決定未來：「短短六個鐘內變成咁，我係唔相信，我唔係唔接受。我嘅感覺係，喺政府醫院，輕症嘅等到變成重症；重症嘅等到無得救。」Cindy示意，不會終止丈夫的生命，也不會放棄治療。

因床位不足 強迫返家護理

Cindy丈夫最後雖保住了性命，卻變成植物人。一個月後，醫院通知Cindy因床位不足，胡先生必須出院，但Cindy找不到院舍收留她丈夫，糾纏九個月，在院方單方面申請胡先生的監護令後，Cindy無奈接丈夫回家照顧：「究竟有幾多植物人係返咗屋企？或者係喺醫院？無人答到我，你要趕我出醫院，你有無畀我一啲確實資訊，話畀我知應該點做？係無。」

「我問可唔可以安好頭骨再出院，醫生話無必要，因為佢係植物人，我問『咁頭骨點呀？』，佢哋答『可能揼咗啦』。」對此，Cindy很不解，亦令她情緒波動：「我絕對接受唔到，喺醫療、社福甚至法律都幫唔到我，我就好似孤軍作戰。」

Cindy一家原屬於中產，面對丈夫龐大的醫療開支，她只好將唯一的自住物業出售，但都無怨無悔：「我話初初會用兩年時間，我耗盡所有積蓄都無問題，咁兩年佢有進步我就繼續落去。」她一個人在家照顧植物人丈夫足足五年，丈夫由要用胃喉進食變到可用口吃東西，甚至拿到乒乓球拍，這對植物人來說都是進步。

疲於照顧 多處發現癌細胞

丈夫的進步並不是偶然，而是Cindy用一雙手及健康去換取：「兩個鐘轉一次身，佢嘅被單係全部濕晒，得我一個人，要同佢換都幾吃力。」因為沒有工人願意做這工作，除女兒課餘時幫忙，以及社署提供的家居護理和陪診服務外，Cindy基本上是一個人廿四小時照顧丈夫。

「對眼啱啱做完手術，淋巴有癌細胞，肝臟亦有腫瘤，依家做緊化療，真係好攰。」照顧植物人丈夫五年，Cindy身體終發出警號，今年一月身體多處部位發現癌細胞，幸好因為丈夫的狀況改善了，二月終於獲安排送入社署資助的安老院。

Cindy過去幾個月未能經常去院舍照顧丈夫，丈夫的身體狀況又退步了，需重新用胃喉進食，Cindy希望當自己打贏癌魔後帶丈夫回家：「可能做一啲精神上嘅支持，體力上我都無信心。」

Cindy丈夫中風最終變成植物人那年，他們的女兒剛好十七歲。爸爸作為家庭經濟支柱，突然倒下了，女兒原想不讀書出來工作幫補家計，但Cindy堅持要女兒完成學業，亦催促她畢業後盡快結婚，女兒聽她的話，去年和男友拉埋天窗：「我唯一可以犧牲嘅就係個女，我嘅精神已經去唔到付出咁多關心，我都安心因為佢好聽話，依家佢兩邊走都好辛苦，又要照顧爸爸又要照顧我，但佢都無怨言。」

將經歷成書 冀指引同路人

作為植物人照顧者，Cindy一路走來跌跌撞撞很辛苦，有見於在香港有關植物人的資訊嚴重匱乏，於是她將過去照顧丈夫的經歷，寫成《真空》一書，希望讓日後的同路人，多一點指引：「我希望呢啲訊息可以畀佢哋起碼喺抉擇上，點樣行佢哋嘅路，比較清晰少少。」