政情：錢大康虛火盛睇中醫「頭髮都黑番」
近年浸會大學校政風波不斷，校方處事手法屢惹起學生不滿，浸大校長錢大康成為部分學生狙擊對象，錢大康尋日出席浸大中醫活動時自爆，近兩年睇多咗中醫，每次開會後都被校內「第一名醫」直指「濕、燥、虛火盛」，而且「好(慶)」兼「氣頂」喎，究竟點解會咁呢？
話說浸大─賽馬會中醫疾病預防與健康管理中心尋日開幕，錢大康致詞時向浸大協理副校長（中醫藥發展）卞兆祥致謝，話對方不但出心出力籌備，而且每次開會都關心自己健康狀況。
自稱係未病防病嘅人辦
錢大康坦言，自己身體有小毛病，但以前幾乎無睇過中醫，近兩年黐得卞教授多，服過幾劑中藥同保健湯水，臉色果然有好轉，「現在畀學生鬧都冇咁氣頂，頭髮都開始變黑。」
錢又笑言自己係「未病防病，已病防變」嘅「人辦」，呼籲市民冇病都可以到浸大新開嘅中心，防患未然，強調健康同藥物研發係浸大十年發展計劃重點，利用大數據推動中醫邁向科學化、規範化。