政情：阿基退民協掟煲唔掟蓋
民協前主席、前立法會議員馮檢基（阿基）尋日宣布退出有份創立嘅民協，走去搞壓力團體，不過呢個壓力團體仲會同民協等政黨合作，而且又會喺好多民協成員都有參與嘅民社服務中心繼續做主席，真係「掟煲唔掟蓋」！同民協嘅關係就咁含糊，炮轟民主派唔民主就好清楚嘞，仲點名批評議會陣線立法會議員朱凱廸、民主動力前召集人鄭宇碩添！
稱暫未考慮九西補選
阿基話，退出民協令佢「好唔開心、好唔想見到」，但覺得壓力團體比較聚焦民生議題，容易同政府「拗手瓜」，希望離開民協，以「壓力團體加政黨」做到「一加一大於二」嘅效果，唔知咁係咪可以形容佢同民協「藕斷絲連」嘞！
佢又話，新壓力團體共有七個人，包括佢同三個區議員，全部都冇任何黨派，未來唔會參與政治，會專心搞民生工作，不過如果成員想參選都可以，例如各區議員都可能會角逐連任，不過就唔係用壓力團體嘅名義喇。
對於外界一直關注阿基仲會唔會參加立法會九龍西補選等選舉，阿基就不置可否，只係話暫時未有考慮，過往幾個月專注寫新書同搞退出民協嘅事，冇時間諗其他嘢，包括選舉喎。
炮轟「民主派唔民主」
阿基又話，退黨與年初立法會補選民主派初選嘅「屈基」事件無關，不過承認當時唔係幾開心，仲炮轟「民主派唔民主」，特別點名批評朱凱廸同鄭宇碩曾公開表明唔支持佢做泛民「Plan B（後備人選）」，又多次勸退佢，強調民主係民主派嘅生命力，如果連民主派都唔民主，民主派未來又點維持落去呢？
阿基認為，一係一開始就唔好畀佢參加初選，否則冇理由唔畀佢做「Plan B」，大鬧泛民「屈基」係唔尊重機制、違反合約精神同針對佢本人。睇嚟「屈基」事件令阿基對泛民好失望，唔知會唔會影響佢對參加補選嘅決定呢？