中環出更：郭偉強囝囝拒商界「甜頭」請林健鋒食檸檬

勞工界同商界喺取消強積金對沖、最低工資、標準工時等多個勞工議題上，一直都有好多爭拗，唔知係咪有其父必有其子，工聯會立法會議員郭偉強嘅囝囝骨子裏都流住勞工嘅血，見到商界議員林健鋒（Jeffrey），都怕怕醜醜好避忌，連Jeffrey請食零食都唔敢接。唔通佢咁細個就識拒絕商界嘅甜頭？

話說郭偉強尋日帶咗阿仔去立法會會議廳外，阿仔相當識做，工聯會麥美娟同保險界陳健波話要抱，佢都來者不拒，仲同佢哋係咁傾偈，成個親善大使咁。

不過，當Jeffrey拎咗啲零食出嚟諗住請佢食，阿仔就企到遠一遠，唔敢行埋去拎。郭偉強就話平時喺屋企食薯片，阿仔就會搶薯片食o架。於是，Jeffery就將啲零食畀咗郭偉強，果然阿仔就即刻衝埋去老竇度拎喇。

勞資雙方一向都好鬼多爭議，唔知郭偉強係咪自細開始教阿仔，唔好貪圖商界嘅便宜呢？定純粹係因為阿仔見到Jeffrey特別怕醜呢？

卓妮