中環出更：張宇人分神打機開會齋聽
立法會議員以公帑出糧，開會唔留心就認真抵打啦！不過，尋日立法會開會期間，卓妮又發現啲唔專心嘅議員，好似進出口界議員黃定光（象哥）又瞓咗，而飲食界議員張宇人（Tommy）就玩接龍，事後仲理直氣壯咁話自己邊打機邊聽緊個會喎。係咪有認真聽呢，只有佢自己先知喇！
話說尋日立法會答問會，唔少議員都不停撳電話，卓妮留意到Tommy不時用電話玩接龍，事後問番佢，佢直認有玩，仲話自己有一路聽緊個會，玩得就唔怕被人影咁話。
黃定光邊瞓邊運動
至於成日畀人影到喺開會期間瞓覺嘅象哥，尋日疑似再搵周公，不過今次「進化」咗，一邊閉目，一邊會郁吓手指、擰吓個頭、做埋頸部運動添！唔通夢遊？象哥事後解釋，之前睇世界盃英格蘭大戰克羅地亞，搞到有啲頸緊膊痛，所以做吓運動鬆吓咁。佢仲大讚克羅地亞無欺場，跑足百二分鐘，好佩服佢地嘅拚搏精神。
講起睇波，作為英格蘭擁躉嘅立法會議員張國鈞（Horace）話，雖然英格蘭入唔到決賽，但入到四強已經當贏咗，佢決賽會撐克羅地亞，事關喺南斯拉夫未分裂前，有「歐洲巴西」嘅美譽，而決賽當日咁啱撞正朋友生日，到時將會喺餐廳一邊慶祝一邊睇波咁話。
Horace仲話，未做議員前，會飛去英國睇波撐愛隊車路士。英超下個月先開鑼，加上區議會同立法會嘅換屆選舉都並非今年舉行，佢話會考慮吓係咪撲飛睇波喎。
卓妮