阿安正在地盤工地戶外地方電弧焊接，突然天色轉暗，更下起毛毛細雨，但由於要趕進度，阿安沒多加理會，繼續工作。工友阿全見到後，立刻上前要求阿安停止手頭工作。
阿全：「阿安，之前入職安全培訓講過，落緊雨就唔好喺露天嘅地方做焊接工作，好危險(0架)！」
阿安：「得個幾滴雨，唔好大驚小怪啦。」
阿全：「你睇吓，啲電焊設備都開始滴到濕咗，你啲衫褲又濕晒，咁樣好容易觸電(0既)！」
阿安：「如果感覺到觸電，我就即刻鬆手，唔會有事嘅。」
阿全：「你咁諗就大錯特錯！觸電後，前臂肌肉會持續收縮，到時你想鬆手都鬆唔到。而且，電流通過心臟時，會引致心室纖維性顫動，令心臟唔能夠正常跳動。喺正常情況，心臟每分鐘有規律跳動約六十至一百次，但觸電時，心跳會增加到每分鐘幾百次以上，如果心臟負荷唔到就會導致心臟停頓而死亡。之前有單工業意外就係因為落雨，個焊工成身濕晒都繼續戶外焊接，結果觸電死亡。」
阿安：「真係估唔到觸電嘅後果原來咁嚴重。」
阿全補充：「加上天文台啱啱發出咗雷暴警告，企喺空曠嘅地方工作會成為地面最彎曲地方，集中嘅電荷會較多，會較易畀雷擊中。」
阿安：「仲講？快啲入去室內避吓雨先啦！」
職業安全健康局
www.oshc.org.hk