政情：出紅黃牌 陳沛然用球例教女
立法會醫學界議員陳沛然（Pierre）鍾意踢波就係人都知，不過估唔到佢連教女都要用足球規例！事緣Pierre日前喺網誌貼出一封「給外出女兒的信」，提到佢個女愈嚟愈大，開始會同朋友出去做功課、行街食飯、遊山玩水，而為咗保障個女嘅人身安全，Pierre就同個女約法三章，要求佢「對自己、別人、爸媽負責任」，例如識保護自己、對人有禮貌、同父母交代行程等，等Pierre可以放心咁話！
出意外就收警告
不過約法三章係唔夠嘅，Pierre講到明會賞罰分明，如果個女唔聽話，出咗意外，佢就會出「黃牌」警告，再犯的話就「兩黃一紅」，「離場」之餘仲要罰停賽。仲話一次「紅牌」就停賽一場，兩次「紅牌」就停兩場，實行愈罰愈重喎！