中環出更：黃家和法國酒莊有靈氣 蔡冠深讚長住享壽120歲
中華總商會會長蔡冠深早前率領代表團赴法國巴黎進行交流考察，辦完正經事，一行人即專程去中華廠商聯合會副會長黃家和（Simon）喺波爾多附近有三百年歷史嘅酒莊參觀。Simon喺社交平台放上多張相，其中一張見到佢哋手牽手圍住一棵參天大樹，童心未泯咁，原來呢棵紅杉有成千年歷史，要八個人先圍得住，係莊園百樹之王。難怪蔡冠深話，若長住呢個地方，可享壽一百廿歲添！
去酒莊參觀嘅仲有中總副會長楊華勇、廠商會會董吳懿容同蔡冠深太太蔡關穎琴（Janice）等人。雖然佢哋逗留嘅時間唔長，天氣仲有啲熱，但不減大家周圍參觀、試飲紅酒嘅興致。
紅杉古樹逾80米高
Simon話呢棵引起眾人興趣嘅紅杉古樹位於莊園要塞，係成個莊園最高最大嘅，估計超過八十米高，即差唔多廿六層樓高。事關佢曾經玩航拍，將高度定喺七十米左右，以為可以飛過樹頂，點知航拍機撞上樹頂，仲斷咗兩片機葉，鏡頭都歪埋。有一次財經事務及庫務局前局長陳家強同太太到訪莊園，陳家強太太都覺得棵樹好有靈氣，話畀佢嘅氣功師傅知，結果師傅教佢即刻喺樹下練功添！
今趟法國之旅Janice除咗做「跟得夫人」外，亦帶仔女搵好友歡聚。Janice笑笑口話今次係全家出動，除咗老三之外。其中大女頌思咁啱喺法國拍廣告，大仔雋思同老四捷思就去參觀酒莊，學做酒業生意，至於細仔展思啱啱中學畢業，就當係畢業旅行啦！
卓妮