名曰規管電子煙 港府眼中只有錢

呢，立法會今日討論修例規管電子煙同加熱煙呢類新興煙草產品，包括唔准賣畀未成年人士、唔可以用廣告宣傳咁。表面睇好似好為市民健康着想，實際上所謂規管，其實即係好似傳統煙咁可以徵稅，變相將非法嘅電子煙合法化。反吸煙團體就講得啱喇，政府幾年前仲講緊點樣全面禁止電子煙，依家一個屈尾十由禁變唔禁，簡直係政策大倒退，自打嘴巴。

提起電子煙，坊間有好多誤解，有啲人話比食傳統煙冇咁大傷害，有啲又話可以用嚟戒煙。有電子煙業界仲賣花讚花香，話好適合用嚟替代傳統煙，又可以加入士多啤梨、雲呢拿口味，甚至維他命添加劑，當正健康食品咁嚟Sell都得。不過世衞組織多年前已踢爆謊言，直指食電子煙仲衰過食傳統煙，事關啲添加劑加熱後會釋出致癌物。更有調查發現，本港有唔少小學生都有食過電子煙，你話嘞，電子煙危害眾生更荼毒青少年，係咪應該全面禁止吖。

不過咁，電子煙雖然害人不淺，偏偏政府樂意做幫兇，食物及衞生局局長陳肇始更加此地無銀三百両，話「規管電子煙係循序漸進嘅做法，唔構成將電子煙合法化、合理化，長遠目標都係要建設無煙香港」。咁都噏得出，即係當人三歲細路啫。

咁點解港府無視反對聲音，係都要「規管」電子煙呢？道理一字咁淺，咪又係錢作怪。家陣電子煙雖然大行其道，周圍有得賣，但因為未納稅，屬於走私及地下消費，差人可以拉o架，一旦電子煙納入規管就唔同講法，政府可以冠冕堂皇咁抽稅。咪以為嘢小吖，煙草稅每年為政府帶嚟幾十億港元收入，呢個貪財政府見到電子煙有利可圖，點會唔流口水？理得你鬧佢政策矛盾又好，違反禁煙初衷也罷，最重要係過水濕腳撈番筆，班高官由始至終關心嘅都係搵錢搵錢再搵錢，為着庫房袋袋平安，攞市民健康較飛也在所不惜。

講起都諷刺，政府宣傳片將吸煙嘅危害講到好可怕，話可以導致陽痿、爛腳等等，又話「電子煙同煙仔一樣有尼古丁、會上癮」。不過為咗錢，更因為屈服於業界壓力，市民健康就話之你，神又係佢，鬼又係佢，你話呢個政府係咪好似電子煙一樣咁害人精！