政情：林正財唔會戒口錯過美食

為靚奶茶去南山邨

林正財仲話鍾意食好嘢，但佢所講嘅唔係貴價食物，因為佢覺得食物產量少就自然會貴，所以貴唔代表好食。佢仲覺得要學識欣賞食物，亦要認識食物嘅營養，咁就可以嘆美食之餘又夠健康。佢仲自爆會同三個仔女，為嘆一杯靚奶茶特登抽時間去南山邨嘅冬菇亭添！果然貼地。

多做運動身體好，佢話現今普遍早死嘅人係因心肺功能差，所以佢熱愛踩單車，可以加強心肺功能又唔怕傷關節。佢話平日踩單車時，附近總會有其他後生仔，可以靠對手歲數去判斷到自己心肺功能大約幾多歲，而佢現時可以追上甚至超前三十歲嘅車手嘞！睇嚟佢心肺功能好好喎。