中環出更：唔驚覆核空置稅 波叔老定
政府本月內將公布開徵一手市場待售住宅單位空置稅詳情，地產建設商會已表明反對徵收空置稅。財政司司長陳茂波（波叔）尋日出席一個活動後被問到驚唔驚空置稅會被司法覆核，佢就話：「唔驚」，因為已經想清想楚喇！真係好老定咁喎，但若果有人入稟提出司法覆核嘅話，睇怕唔知要拖到幾時先可以實施喇。
政府指一手樓空置單位有九千個，為免地產商囤積樓宇就開徵空置稅。地產建設商會日前已表明反對，加上部分商界人士都擔心徵收空置稅嘅話，地產商會轉嫁畀買家，最終推高樓價，所以話情況並唔樂觀。
講錯今日公布詳情
對於幾時公布詳情，波叔先係話會今日講，跟住又停一停，話等埋特首返嚟先。點解佢會停一停、諗一諗呢？事關今日開行政會議，可能佢以為行會今日就會拍板，後來先醒起特首正喺歐洲訪問，仲未返嚟，所以就改口。
另外，政府尋日公布話波叔今晚啟程訪京，訪京期間會拜訪財政部、商務部同國務院港澳辦公室等，就算行會今日就空置稅拍板，佢傍晚就起行，又夠唔夠時間就空置稅向外界解畫呢？