打波先嚟落雨，游水先嚟冇救生員，你話係幾咁掃興呢。冇計喇，康文署善財難捨，敷衍塞責，管理失職，每逢泳季都請唔到足夠救生員，搞到要封灘關池。炎炎夏日，市民有水冇得游，嗰種失落，真係拍得住阿根廷擁躉又一次睇住美斯射失十二碼呀。
嗱，暑假就快到，有救生員工會統計過，康文署轄下嘅泳灘同泳池，目前仲爭三百四十多名季節性救生員先至應付到需求。救生員人手不足，都可以話係存在已久嘅問題，早前仲被本報踢爆，部分訓練池及跳水池嘅瞭望台無人駐守，但依然開放畀公眾使用，泳客命仔凍過水。康文署無計可施，惟有斬腳趾避沙蟲，今年四月起局部關閉十個泳池及泳灘，工會估計隨住旺季來臨，將有更多泳池同泳灘受影響，提醒市民游水前最好上網查清楚，免得着晒泳衣泳褲山長水遠去摸門釘咁掃興。
為咗頂檔過骨，康文署惟有聘請季節性救生員湊數，點知出手太低，冇乜人肯落疊，泳池泳灘依然隔三差五局部關閉，擾民依然，陷入惡性循環。呢嗱，今年康文署又諗住重複舊橋，向季節性救生員發放相當於合約期總薪酬約一成嘅約滿酬金，希望提高吸引力。可惜吖，合約期只有短短兩個月，點計都係冇乜肉食。單係過去三年，季節性救生員空缺率節節上升，舊年東區嘅空缺率仲高達四成四添，如果約滿酬金呢招真係奏效，就唔會搞到封灘關池七十幾次啦。
講嚟講去，救生員長期人手不足，癥結係康文署玩大細超，搞新舊制員工同工不同酬。當局話就話年年同工會談判，實際上一直傾唔埋欄，次次不歡而散。結果救生員三日唔埋兩日搞集體請病假，再唔係索性罷工，仲要專揀紅日假期「發作」，令市民煩不勝煩。最經典係工會前主席郭紹傑請病假參與非法佔中，仲做埋佔中金主漢奸黎嘅私家保鏢，簡直係烏煙瘴氣，令人眼冤。
真係諗極唔明，康文署點解可以無能成咁，乜都管唔掂，泳池泳灘開唔開得成固然要睇救生員頭，就連其他方面一樣搞到一塌糊塗，好似轄下康體設施被人炒賣牟利，署方束手無策；又好似由堆填區改建嘅葵涌公園，十七年來仍然係廢墟一個，點到你唔服吖。
都係嗰句喇，為官避事平生恥。康文署連擺平救生員咁小嘅事都搞唔掂，即係攞泳客條命較飛啫，話係草菅人命都冇誇張。唔係講笑，下個月就係暑假，康文署再唔解決救生員編制及人手問題，萬一有泳客發生意外，邊個孭得起吖！