政情：痛心兄弟掩蓋良知 林子健：友情僅值300蚊
去年八月聲稱自己被擄走，最後被警方以涉嫌誤導警務人員罪拘捕、後改控向警員虛報有人犯罪嘅民主黨（白鴿黨）成員林子健尋日喺社交網站提及單案，話最痛心係嗰啲平時稱兄道弟嘅人，喺政治現實下掩蓋咗良知同承諾，仲話原來友情只係值三百元。究竟呢三百元係點計出嚟？佢就冇提及。
林子健喺貼文中提及，批評上述人士唔知真相、過程同嗰啲所謂嘅證據，但自以為係福爾摩斯咁說三道四。其實林子健曾喺白鴿黨嘅「真兄弟事件」中，被黨內元老指派擔任臥底，調查黨內少壯派懷疑遭中共滲透嘅指控，事後佢被部分黨友排斥同攻擊。唔知佢貼文中所講嘅稱兄道弟嘅人，係指乜嘢人呢？係咪黨內人呢？只有佢自己先知嘞！
生得靚仔會有多啲信任
最後佢又話同意某啲人所講，若果佢係一個英俊嘅人，至少會獲取更多信任，又自嘲話可惜外表方面，亦唔係佢能控制同改變喎。