政情：一年前撤出熱廚房 譚志源自爆怕離地
問責官員成日被批評「離地」，搞政策唔知民間疾苦，亂咁安排，搞到社會怨氣都幾大。就連政制及內地事務局前局長譚志源（Raymond）尋日出席電台節目嘅時候，都自爆不留任現屆政府、選擇離開「熱廚房」嘅其中一個原因，係自覺職位愈高、自己愈離地。咁睇嚟佢依家離開政府，都係識得反省，想盡力令自己貼地啲嘞！
Raymond話自己出身基層，大學畢業後加入政府足足三十年，制訂嘅政策可以影響市民，但就未能明白佢哋嘅感受。佢亦唔想退休前未做過其他工作，於是就開始考慮投身其他行業。
做其他工直接貢獻社會
立法會近年「拉布」嚴重，原來都係影響Raymond離開嘅原因之一。Raymond自稱立法會拉布嘅第一代「受害者」，批評拉布同點人數無助社會進步兼好嘥時間，試過喺議會等咗幾個鐘先可以回應質詢，做唔到任何嘢，認為做其他工作更能直接貢獻社會。
八月轉新職 盛傳去馬會
唔做局長後，Raymond任職醫療集團嘅副主席，但佢將於本月三十日離任，即係上任未夠一年就走人，但會轉任集團高級顧問。至於新動向，佢就冇透露，據知佢八月就會返新工，新公司唔係政府機構或上市公司，政界盛傳佢將會去馬會工作，Raymond回覆查詢時就指「不會回應」。
Raymond自小成績優異常名列前茅，佢坦言細個會為屈居第二名而落淚。適逢尋日係父親節，Raymond喺節目中分享亡父嘅點滴時感慨萬千，佢話每次考第一，爸爸都會拖住佢去西餐廳鋸扒，仲會好proud（驕傲）咁向侍應晒命；而佢作為家中唯一嘅男丁，爸爸對佢寄望甚殷，更因佢考入香港大學，爸爸就回鄉設宴款待鄉親，到咗做官更加大事慶祝。
可惜嘅係爸爸喺Raymond仕途最唔如意嘅時候離世。Raymond話爸爸舊病復發，當時佢每日都去醫院探病，有一日因為做到好晏，諗住翌日先去，點知從此永別，爸爸喺半夜走咗，佢直言呢件係佢人生最遺憾嘅事，亦令佢學識要平衡工作、家庭等方面嘅重要性。