中環出更：買唔起樓就買車 容海恩撐陳帆？
土地房屋係本港近年一大難題，搞到運輸及房屋局局長陳帆去年講塞車時，提起「年輕人買唔到樓就買車」，就被人批評「離地」，殊不知事隔大半年，新民黨立法會議員容海恩（Eunice）尋日喺一個論壇上竟然講出「年輕人買唔起樓都會想有車方便出入」，唔通佢想公開撐陳帆？
批評政府冇發展科技
原來唔係！Eunice當時咁講，其實係批評政府唔應該因為冇車位，就叫年輕人唔好買車，因為杜拜等國家已經發展科技，令原本只可以容納二百個車位嘅空間，增至可容納四百個，應該發展科技，以改善空間運用。
睇嚟Eunice喺科技問題上，與政府並非同一陣線，反而難得與泛民同聲同氣，佢與出席同一個論壇嘅民主黨吳思諾，一齊批評香港教育政策單一，中學生要承受考試操練嘅壓力，大學生揀定學科後，難以跨幾個界別發展咁話喎。
卓妮