開講有話：「人衰行路打倒褪」，做生意都一樣嘅咋，衰起上嚟頭頭碰着黑，連部電腦都要玩嘢罷工，國泰航空伺服器大故障咪係經典例子囉。
呢，前日有國泰員工爆料，話返機場當值嗰陣，發現國泰當值簽到用嘅電腦通通跪低，要改為人手簽到，懷疑係伺服器出咗問題。而且唔止員工受影響，連預辦登機、訂位同管理行程等網上服務都一概用唔到，要改為人手辦理登機手續，甚至連全球電話中心同投訴系統都廢埋武功。國泰下晝當機，到夜晚九點至喺社交網站發文公布，十點至搞番掂，都咪話唔擾民。
講真，提起國泰近年點樣管理不善，點樣喺全球最佳航空公司排名榜節節下跌，真係三日三夜都講唔完，今次伺服器當機又試搵着班乘客嚟搞，你話係咪煩吖。不過國泰真係要劏雞還神咯，唔係話佢哋連投訴部都冧埋機，可以大條道理唔聽乘客投訴，而係話呢單嘢好彩發生得早，若然喺暑假旺季發生，撞正港人外遊高峰期至爆大鑊，肯定杰撻撻都似，到時唔倒瀉籮蟹就有鬼咯，仲隨時成為國際醜聞添。
你話喇，廉航推出平價機票就話爭崩頭啫，就算搞到冧伺服器都叫做情有可原吖，但國泰載客量係咁跌，加上咁大間公司，伺服器咁都出事，IT部門有幾渣，國泰管理有幾差，大家心照咯。最衰係國泰仲要遮遮掩掩，下晝出事，夜晚至嚟公布，今時今日咁嘅服務態度，梗係唔得喇，難怪被乘客狠批愈做愈差。呢，有乘客向本報投訴，指伺服器故障雖然未至於影響登機，之但係國泰服務每況愈下就係不爭嘅事實，座位愈來愈窄唔在講，仲要濫收會員又提供唔到尊貴服務，簡直係趕客咁話。
咁又係呀，早排至有乘客幫襯國泰買機票，點知被呃會員積分同飛行里數，經本報介入，國泰先肯認衰補鑊，呢啲唔係店大欺客係乜呢？都仲未計技術故障要折返、貨艙機門閂唔埋要乘客呆等一類無奇不有嘅事故，咁冇水準嘅服務表現，乘客有乜法子唔一肚氣吖。
講開又講，國泰管理層雖然話暫時冇轉型做廉航嘅打算，但就話探索緊廉航嘅模式喎。咁即係點？即係叫乘客做定心理準備，國泰表面上唔係廉航，實質係廉航囉，到時乘客唔止有機會坐二手老爺機，服務水平同樣廉航化，但機票價錢可能係另一回事囉。
講到尾，國泰呢個百年老店近年不思進取，至會淪落到今日形象插水嘅局面。再咁落去，伺服器故障都可能係小兒科咋，更多意想不到嘅亂象肯定陸續有來。