香港嘅強積金一向被人鬧爆回報低、收費高，退休儲蓄靠晒佢就大件事。積金局主席黃友嘉尋日就喺網誌死撐，話強積金可貴之處係入場門檻低，供款額得百幾蚊都可以投資，仲可自選投資市場及資產，反問市場上邊有咁低門檻嘅投資產品喎。黃友嘉真係冇嘢搵嘢嚟講，強積金係為咗保障市民退休生活所需，最緊要係投資回報夠理想，家陣佢冇厘頭搬出供款額冇下限當優點，唔通一個月得百幾蚊供款，真係可以投資出一個無憂嘅未來？
