中環出更：黃國健獨食午餐 睇報告當加餸
立法會雖然內設餐廳，但因食物選擇少，部分熱門菜式又極速售罄，搞到唔少立法會議員都寧願出外搵食。好似工聯會議員黃國健（KK）咁，早前就一支公去咗金鐘海富中心嘅飯堂醫肚，佢仲一邊食一邊揭文件，到底係咩事咁緊迫，令佢要一路食一路睇呢？
笑言慣咗邊食邊睇
身穿黃色恤衫嘅KK一個人喺餐廳獨食，佢叫咗碗米粉，只見佢不斷咁倒入個口度，似乎相當肚餓，而佢全程睇緊嘅原來係一個職工會嘅報告，結果唔使半個鐘就搞掂個午飯離開。我哋上前同KK打招呼，佢笑笑口話，以前食飯時會一邊食一邊睇報紙，隨住科技進步，依家新聞可以喺電話睇到，但係佢又慣咗睇吓字，所以就拎咗本工會報告出嚟當「加餸」囉！
卓妮