中環出更：懷舊金曲慈善夜 張德熙歌神上身
本港慈善機構嘅行政費用高企，令實際用於受助人嘅善款大打折扣，情況為人詬病。香港少數「零行政費」嘅善團泓福慈善基金早前舉行懷舊金曲慈善晚宴，金銀業貿易場理事長張德熙（Haywood）都有到場，佢話泓福將一分一毫都用喺受眾身上，好值得支持。佢仲喺壓軸時獻唱幾首英文經典名曲，唱到歌神上身咁款，台下賓客猛叫Encore添！
名人圈中流傳Haywood好唱得，但卓妮就未聽過。同Haywood分屬老友嘅泓福候任副主席李文偉爆料話，佢通常飲咗幾杯酒後先會開金口。果然當晚臨近尾聲，喺台下欣賞唱家班獻唱嘅Haywood終於技癢，上台同壓軸表演歌手吳國敬合唱多首英文歌，將現場氣氛推上高潮。
嚴偉貞扮慈禧氹人開心
愛心飯團創辦人黃國權及香港左軚汽車商會副會長戴天為都喺度。講起將善款用於實處，壽臣山獅子會創會會長嚴偉貞及會長張愛瑜經驗豐富，事關獅子會嘅精神就係親力親為，為弱勢族群服務。鍾意唱歌嘅嚴偉貞亦經常為慈善而唱，佢因為聲線唔高，啱唱歌聲低沉嘅樂壇常青樹徐小鳳啲歌，所以早年經常着經典波波衫扮小鳳姐氹長者開心，依家就改扮慈禧太后，唱《少女慈禧》等八十年代名曲。實行氹人歡喜，自己都玩得開心。
下月將出任泓福副主席嘅李文偉話，基金成立十年來已喺香港幫助逾三萬名獨居長者、低收入家庭兒童及傷健人士，仲喺內地興建六間小學。由於堅持零行政費，所以需要大量義工，歡迎市民齊參與喇！
卓妮