同樣係掃黑除惡，內地就雷厲風行，既打黑惡勢力，又打保護傘，治標又治本；香港就例行公事、軟手軟腳，淨係做表面文章，冇觸及惡勢力得以生存嘅土壤，結果唔使問阿貴，梗係斬草不除根，春風吹又生喇。
呢，內地近日掃黑除惡行動如火如荼，唔止搗破數以千計嘅黑幫組織，更加對藏身喺執法機關內嘅「保護傘」冇情講，河北、四川、廣東等多地已先後有黑警同埋黨員幹部被撤職、開除黨籍或移送檢察機關處理，福建則有一對父子檔官員被指充當「保護傘」同時被拿下。內地官媒揚言要對執法機關內「保護傘」問題從嚴處理，顯示當局除惡務盡嘅決心，絕對唔係講笑0架。
不過咁，仍然有人唔識死，以為內地今次只係做循例性執法工作，有本港黑幫唔理風頭火勢照樣北上，結果喺十億可卡因案斷正，九名港人被捕，正式係壽星公吊頸──嫌命長，佢哋嘅下場係點，唔使問都知嘞！
喺內地大刀闊斧掃蕩污泥濁水嘅同時，香港又點呢？以港警一年一度嘅「雷霆」行動為例，今年係就係掃咗好多毒窟、賭檔同淫竇，切斷黑幫唔少收入來源，不過就唔係好見有針對「保護傘」嘅行動囉。咁就好似掃地，只吸走地氈上嘅塵埃，但地氈下臭蟲曱甴依然喺度，今年做做樣打完一輪，下年又打過，年年行禮如儀，不痛不癢，打極都唔會完，何止「雷霆17、18」，直頭做騷做到「雷霆99、100」都未掂呀。
講到底，香港黑惡勢力問題之所以根深柢固，就係因為有人包庇！就講和勝和前坐館、泰國大毒梟「上海仔」郭永鴻吖，佢老哥無惡不作，臭名昭著，但喺香港出入自由，無法無天。仲有呀，今次更喺落鑊之前詐病棄保逃亡，擺明有人提前通風報信啦。鬼咩，上海仔不嬲同警方關係密切，既有退休警司拍住佢去澳門搵食，又有警方高官出席佢嫁女宴，甚至有官至助理一哥嘅警隊高層同佢老友鬼鬼，警黑一家親就係咁解。
仲有呀，上海仔明明有兩案四罪在身，律政司拖咗兩年幾唔起訴佢，等於間接幫佢逃之夭夭。上海仔有警方同司法兩頂保護傘照住，唔怪得有恃無恐，仲走去勾結埋南亞兵團喇！
有乜嘢父母，就有乜嘢子女；有乜嘢土壤，就長出乜嘢草木。香港黑惡勢力尾大不掉，深夜十二點後係黑幫嘅天下，講到底就係港府無能又腐敗，無間道點止電影橋段咁簡單。一句講晒，掃黑除惡問題嘅本質其實就係反腐敗，一日有大大個保護傘戙喺度、乜鬼雷霆行動都係假！