政務司司長張建宗（圓圖）日前傷腳，戴住腳托都返工出席公開活動，貫徹佢工作狂嘅作風。尋日佢又出席一個青年活動，雖然佢上、落台時需要工作人員扶着，但平地就唔需要撐拐杖，步伐仲同平時無異。而佢用半鹹半淡嘅普通話致詞時就話，呢個活動好有意義，所以帶傷都要出席，又話喺腳傷中悟得道理，就係「做乜嘢都唔好太過分，要中庸之道」。據了解，佢喺官邸附近行山時因為太用力而拉傷咗，唔怪得話要中庸喇！
