政情：梁耀忠同官員視察「山墳」 街坊即嗌「拆咗佢」
葵芳興芳路與興寧路交界最近多咗件名為「安全島」嘅大型藝術品，但就畀網民同街坊嘲笑似「山墳」，仲形容為「地區小白象」。身兼葵青區議員嘅立法會議員梁耀忠（阿忠）前日就聯同發展局官員及展品設計團隊代表到場視察，咁啱有位女街坊行過，就大聲叫︰「快啲拆咗佢！」連設計團隊都話，市民嘅反應係佢哋預想唔到咁話。
移走前做展示牌介紹
阿忠話佢原本都有帶同一名投訴者，去向當局表達意見，點知就有路過嘅女士即場要求清拆。相信街坊坦率嘅意見令設計團隊都幾尷尬，阿忠引述團隊代表話都明白街坊嘅反應好強烈，佢哋會同當局傾清拆事宜。不過喺未移走前，暫時會做啲展示牌，解釋吓件展品。唔通以為街坊了解多啲，就唔會咁反感？
呢個以「動感之都」為主題嘅比賽，由評審團選出四個藝術作品，並由各藝術作品嘅設計團隊喺指定地點安裝同展出，每個作品嘅安裝費用上限為八十五萬元。阿忠就話呢八十幾萬元唔止係安裝費，仲包埋移除費用嘅。