政情：外訪跟團呻笨區議員玩自由行
政府由今屆區議會開始，向每一位區議員發放一萬蚊外訪津貼。臨近換屆，呢排唔少區議會陸續開團外訪，好似沙田區議會咁一行十人喺四月九日至十二日外訪新加坡，但瀝源選區議員黃宇翰就「自由行」，自己買機票同訂酒店再向區議會申報。因乜解究唔跟團？佢就呻旅行社「搵笨」，叫價太貴，一於自己整「全包宴」，既可「貼地」了解當地民情風土，又可以慳番筆，咁下次再有外訪團佢都可以繼續再去嘞！
根據區議會最新文件，黃宇翰喺訪問團出發前向秘書處表示，佢會自行安排機票、住宿、當地交通同飲食，而訪問完結後就提交咗相關申領發還其來回香港至新加坡嘅經濟客位機票開支申請，總額約一千八百九十元。黃宇翰話旅行社包團價每人收費近九千元，而佢又要早兩日出發到當地，問到可否改時間出發時，旅行社要求額外畀多五百元，佢就「火都嚟埋」，本來淨機票都要花三千五百元，如果再加錢就要四千元，覺得好唔抵。佢又話雖則係花公帑，都唔應該咁樣使錢，最後索性自己買機票同訂酒店，返嚟同團友同一班機，都唔使二千元。至於酒店，佢住喺團友隔籬，每晚房價約五百元，較跟團一晚六百元雙人房仲要平。
團長何厚祥：僅一間報價冇得揀
黃宇翰再計計數，整個旅程外出用膳，既可揀鍾意嘅食物，又可以體驗當地風土人情，最多都係花約六、七百元，搭交通工具又係數百元，「根本就唔使咁貴」。佢仲八卦到，有部分區議員外訪返嚟，都覺得喺香港跟去外地嘅導遊作用唔大，下次外訪大可搵當地旅行社安排交通同膳食，應該平好多。今次行程中，佢覺得新加坡研究嘅「新生水」同房屋政策，都有好多值得香港參考嘅地方，認為港府應該「學吓」人哋點樣做。
訪問團團長兼區議會主席何厚祥就解釋，今次只有一間旅行社願意提供報價，所以無咁多選擇。至於將來可唔可以「自由行」外訪？佢就認為唔可行，公務外訪多數要集體行動，各自各去會有管理困難，而黃宇翰有親人喺新加坡，加上佢只買自己一人機票，當然可以買到平機票，所以應該唔會再有下次嘞！
其實外訪都係想畀各位議員去考察時，順便激發思維，諗吓點改善民生啫，用唔晒津貼又唔使夾硬嚟，用晒嘞，如果有心嘅都可以自費出團，最緊要都係幫街坊做到嘢！