中環出更：議員下廚較量麥美娟爆冷奪冠
扶康會尋日舉行烹飪比賽，邀請到多位立法會議員同智障人士組隊落廚，而今年賽果竟然爆大冷，由平日甚少下廚、事前全無準備嘅立法會議員麥美娟（Alice）憑泡菜炒雞肉勝出！
尋日除咗Alice，仲有容海恩、譚文豪等議員，陣容可謂相當鼎盛。Alice明言完全無諗過會勝出，因為煮餸期間笑料百出，好似唔識開電磁爐、雞肉放落鑊後先發現未切等。佢就估計，能夠俘虜評審全靠大會為佢預備嘅泡菜，所以要特別點名多謝包泡菜。
Alice更笑言其他議員同佢水準差唔多，更大爆煮蝦嘅容海恩呈上仍然透明嘅蝦，即係仲未熟透，睇嚟呢場比賽都係蝦兵鬥蟹將，佢先偷雞成功拎獎喎。Alice都講明自己只係撞彩，所以唔會因為奪冠而增加落廚機會，況且平日工作忙碌都冇時間喇！
譚文豪話太太唔信佢手勢
除咗有容海恩煮出未熟透嘅蝦，范國威都有極咸嘅腐乳炒牛肉生菜，佢煮完後仲話要多謝太太同媽媽，似乎佢只靠一碟餸就體會到女性平日嘅辛勞喇！而譚文豪就話自己使出看家本領，煮出「鹹蛋生菜浸魚滑」，睇落好似有板有眼。不過，佢就喺Facebook自爆，同太太講晚餐改由佢主理時，竟然遭警告唔好搞亂個廚房喎，似乎佢太太都信唔過佢嘅手勢。
比賽仲有傷健合拍烹飪大獎，呢個獎項最終落入邵家臻手中，可能佢作為社福界嘅代表，同智障人士相處特別有心得而分外合拍喇！而邵家臻烹調期間更不忘工作，把握機會同扶康會主席郭鍵勳傾康復計劃方案，更約埋去到訪社企添，果然有效率！
卓妮