早兩年有套日劇叫做《逃跑雖可恥但有用》，呢個劇名用嚟形容黑幫和勝和前坐館、大毒梟「上海仔」郭永鴻，真係度身訂造都冇咁啱身呀，事關佢正正就係稱病着草、畏罪潛逃嘅「逃恥」人辦。
嗱，上海仔負案纍纍，今日係佢要向香港警方報到嘅大日子，但佢最終會唔會出現，真係要睇過至知。有辦你睇，上個月九號佢本來要為洗黑錢案到警署報到，點知一個屈尾十着咗草，只係透過律師發信畀警方，話自己中咗風要喺泰國一間醫院留醫，冇辦法報到喎。實情係點？實情係佢呢頭話中風，嗰頭就被人影到喺東南亞一個賭場「行得企得」，鬼打冇咁精神。仲有喎，就喺上月九號當天，佢喺網上連發多段影片誹謗富豪，兼涉敲詐勒索，佢係真病定係詐病，大家心照喇。所以咯喎，有人估上海仔今日或會重施故技繼續稱病潛逃，絕對唔係無的放矢，至於係痔瘡發作抑或係更年期心煩失眠、潮熱盜汗，各界就真係要拭目以待嘞。
話時話，上海仔本來就係蠱惑仔一名，佢話自己中風，警方唔係信到十足十呀？過去死刑犯打靶，都要由法醫現場驗證係真死定假死，未斷氣都要再打過啦，家陣上海仔自稱身在泰國中風，點解警方唔派人實地調查？點講都好，報到玩失蹤擺明就係挑釁緊差佬，視法治如無物。事實上，就算警方一時搵唔到上海仔匿喺邊，但只要覺得佢缺席報到嘅理由牽強，一樣可以由律政司開庭，要上海仔或者佢嘅代表律師出庭解畫，需要時更加可以通緝佢歸案，家陣乜事都冇發生，到底係警方做漏嘢，定係有人玩包庇先？
冇錯嘞，上海仔作惡多端卻可以喺香港自由出入，講到底咪就係超級保護傘發揮作用囉。係人都知，上海仔同唔少警隊高層過從甚密，既有前高級警司拍住上去澳門搵食，又有前高級警務人員高調出席佢擺嘅「嫁女」宴，聽講佢嘅警界老友仲高級至助理一哥添。而上海仔早前再次着草，就係被指得到警隊高層提前通風報信，知道即將正式落鑊，於是逃之夭夭。
仲有喎，上海仔涉案多年，但律政司好似同佢有親咁，遲遲唔郁佢，如果唔係，佢又點可能聞風而遁，到依家仍然逍遙法外呀。
講到呢度，大家都知港府就係怕一個「黑」字，漢奸黎搞黑金政治，港府唔單止包庇，仲要搞「大和解」；對住上海仔呢個黑幫大佬，港府一樣買佢怕，坐視其一逃再逃。照咁睇，香港要掃黑除惡只能等中央出手，身兼公安部長嘅國務委員趙克志頻頻出訪東南亞國家就係咁解。