支聯會：尊重不同方式悼念
支聯會主席何俊仁尋日確認今年繼續冇大專院校參加集會，但仍會有年輕人上台進行對話。自學聯喺一六年退出支聯會後，今年係連續第三年大專院校杯葛集會。
何俊仁話今年未必會有學生代表某組織上台，形容兩三年前有人痛罵支聯會，另起爐灶辦活動以取代集會，而今年就冇，相信情況會慢慢改變。佢又話尊重大家以唔同方式悼念，尊重唔同嘅身份認同，但嗰啲鬧支聯會出賣香港嘅言論則屬顛倒是非。
被問及有冇同部分大專團體接觸，何俊仁話一直有同大專學生對話，但今年唔成功，希望明年成功，又認為市民期待再有學生代表上台。至於舊年遊行人數僅約一千人，擔唔擔心今年參與人數再減，佢話對香港人有信心，唔評估數字。