政情：律師信寄區諾軒 陳家珮花$5500

黃成智「票價」高過上屆補選

陳家珮喺今次補選花逾一百八十萬元，每票大約為十四元七角，當中佢只須自掏腰包近六千元，餘款幾乎由新民黨包底，而該黨立法會議員葉劉淑儀同南區區議員林啟暉，分別贊助一萬七千元及約六千元。選舉開支當中，選舉廣告花逾一百四十萬元，包括小巴車身廣告、Fb廣告同其他網站嘅廣告等。

至於喺新界東補選落敗嘅立法會前議員黃成智，選舉開支用咗約七十七萬元，而佢只取得六千一百八十二票，即每票一百二十四元，相比佢喺一六年參加補選時嘅每票九十三元仲要貴。選舉開支中，花咗六十萬元請咗一間公司幫佢搞吓Fb嘅貼文同相、設計Banner同小冊子、草擬政綱同提供相關意見等，當中仲包括演講同辯論訓練。估唔到佢之前做咗咁耐議員，依家都仲要上堂學辯論技巧喎。

黃成智獲得兩筆各捐二十萬元嘅款項，分別來自佢弟弟黃成榮同家人黃秀群。鑑於佢得票率唔夠百分之五，得唔到政府嘅選票資助，扣除咗家人嘅捐款後，佢要畀多三十七萬元，如果計埋沒收咗嘅五萬元選舉按金，就要畀約四十二萬元喇！