政情：泛民區選撞區西貢油尖旺最多
每當有大型選舉，不論各黨派陣營少不免會出現撞區嘅情況。適逢區議會選舉將於明年舉行，民主動力早於去年一月進行協調工作，召集人趙家賢同民主動力秘書梁穎敏尋日同傳媒茶敍時透露，截至現時為止，民主動力協調機制組織同其他友好團體中，有五十四個選區出現撞區，當中西貢區佔十個、油尖旺區佔八個，係十八區中佔最多嘅兩區。
盡量協調 唔搞初選
面對撞區嘅情況，趙家賢話唔會就區議會選舉進行初選，未來會盡量作出協調，令建制派唔會從中得益。佢又預計政府喺年底公布區議會選舉嘅臨時劃界圖，估計將有四百五十二個選區，當中泛民有意喺三百一十九個選區中出選。按此計算下，約有一百三十個選區未有泛民有意出選。
港大法律系副教授、佔領運動發起人戴耀廷發起「風雲計劃」，培訓有意出選明年區選嘅人，趙家賢話戴耀廷曾經講過「風雲計劃」係負責「填窿」，因此希望呢啲人士能夠喺嗰一百三十個未有泛民有意出選嘅選區出戰，避免同民主動力撞區。