政情：區會交流照剪布波哥剪上癮？
為進一步加強立法機關同各區議會之間嘅溝通，立法會議員間中都要「客串」做親善大使，定期同各區議會開會同午宴進行交流。北區區議會喺今個月初總動員去立法會開會，仲提出多項訴求，會後有區議員投訴，話主持會議嘅財委會主席、保險界議員陳健波（波哥）喺會上「裁決」佢哋意見太多，要求只准提一項訴求喎。唔通波哥「剪布」剪得多，連交流會都要出動大鉸剪？
提5訴求被嫌多 區議員呻交流變膠流
北區區議會同中西區區議會喺當日先後到立法會開閉門會議，兼同立法會議員午宴交流。當日北區區議會主席蘇西智都有到場，而有北區區議員話區議會非常重視今次交流，特別吩咐每個委員會都傾一項訴求，最終得出五大議題，包括擴建醫院、增加門診、上水嬉水池改建為標準泳池同交通擠塞等。該名區議員仲話呢啲問題喺區議會一直有討論，政府仲有預留土地做醫療，提出都係想催政府做嘢。
知情人士透露，會上各區議員好認真發表意見，但波哥就嫌佢哋太多訴求，咁樣政府會做唔到，要「做到嘢」提一樣訴求就夠喇！呢句說話似乎令班區議員心裏有條刺，覺得交流變「膠流」，各自表述，根本無結果又無幫助。
陳稱善意提醒 籲先列出迫切性大訴求
唔知係咪波哥平時剪布剪得多，呢次竟然剪到落區議會？點知波哥就喊冤，話自己只係「善意提醒」兼分享同政府交手嘅經驗喎。
波哥話當日有區議員一嚟就「兇」佢，話年年都係提嗰幾項訴求，再搞唔到就下年唔嚟。波哥即刻安撫佢，話係做法唔好，多個訴求令政府有藉口話無共識唔做住，如果年年都係咁唔聚焦就當然做唔到，反建議佢哋列出首幾項迫切性大嘅訴求先，咁政府無得唔做嘛！佢仲叫大家要團結，聚焦處理總好過一事無成喎。
睇嚟波哥喺閉門會議都係講「真心話」，教吓區議員點應付政府，可惜變咗「說者無意，聽者有心」。波哥應該敦促政府做多啲嘢，咁班區議員就無咁多怨氣o架喇！