中環出更：何君堯涉漏報利益 惹泛民狙擊
獨立建制派立法會議員何君堯自上任後，佢嘅言行都非常「惹火」，包括佢曾經發起反港獨集會，期間稱對主張港獨者「殺無赦」嘅言論，以及佢宣稱自己係英國同新加坡「執業律師」，卻被爆無喺兩地正式執業等，統統都備受關注兼被泛民人士所狙擊。最近何君堯又再被踢爆涉漏報多項利益，議會陣線陳志全（慢必）同朱凱廸就去信議員個人利益監察委員會作出投訴，仲叫何君堯快啲認錯兼收拾自己嘅爛攤子喎。
未申報持粉嶺高球場旁農地
近日有指何君堯未有就其家族公司持有粉嶺高爾夫球場旁的農地作出申報，慢必話任何立法會議員就任時，都有責任向立法會申報其資產，包括土地或公司，而何君堯就無申報，質疑何係唔識定係要以「擠牙膏式」申報，每次都要等傳媒揭發先處理。
慢必認為何君堯應盡快檢視自己有沒有漏報其他利益，擔心如果唔追究或令事件輕輕帶過，希望何可盡快處理問題，有錯就認，唔好等到委員會作出警告或譴責才處理。而委員會副主席毛孟靜就話委員會將於本月底召開會議討論相關投訴。
卓妮