以前香港遍地黃金，點知家陣變成遍地泥頭。唔信嘅，去新界打個白鴿轉，不難發現梗有泥頭喺左近。鬼咩，港府執法放軟手腳，業權人唯利是圖，「先破壞後發展」比比皆是，再咁落去，香港遲早變泥頭港、垃圾港咯。
即係咁，環保署執法懶懶閒早就唔係新聞，申訴專員公署同審計署都曾經開火炮轟，可惜吖，批評接受、態度照舊不嬲係港產官僚特色。呢，尋日環境局局長黃錦星書面答覆立法會議員質詢，承認去年接獲喺官地非法棄置建築廢料嘅公眾舉報多達一千八百五十宗，較前年增加百分之五，之但係巡查次數不增反減，只有六千一百多次，比前年勁減兩成八，發出傳票及被法庭定罪宗數亦比前年下跌兩成四，分別只有七十五宗同七十三宗，連帶發出定額罰款通知書嘅數目都大減，只有二十三宗咁大把，問你服未。
真係諗極唔明，投訴顯著增加，巡查及檢控反而減少，到底係咩玩法？黃錦星話喎，環保署近年陸續喺倒泥黑點安裝攝錄機，同埋喺當眼處懸掛警告海報，增加阻嚇力，所以檢控數字先會減少喎。嘩，你唔好再吹大啲！如果真係好似黃局長咁講，靠CCTV同爛鬼海報就嚇到不法分子收手，公眾舉報數字就唔會大幅飆升嘞，好心咪自欺欺人喇。
查實申訴專員公署早就踢爆真正原因，之唔係環保署只肯喺辦公時間進行巡查，周末踢都唔郁，不法分子逃責有法，亂象變本加厲就係咁解。仲有喎，官老爺對官地堆泥都隻眼開隻眼閉，私地亂成點可想而知，加上其他部門同樣得過且過，令問題積重難返。唔係講笑，當局一般只會向業權人發出恢復原狀通知書，業權人唔遵守亦往往從輕發落，罰則不痛不癢，同改變土地用途所得嘅龐大利益蚊髀同牛髀，新界環境有乜法子唔被破壞殆盡吖。
睇到喇，當局執法敷衍塞責，罰則又唔成比例，話係變相鼓勵就差唔多。全城鬧爆嘅天水圍泥頭山變身高爾夫球場咪就係典型囉，業權人唔止先倒泥後植草，仲厚住面皮向城規會申請改變土地用途，最抵死係即使被告上法庭，最終都係罰款一萬幾千蚊了事，完全冇阻嚇力。你話嘞，佢哋連見官都唔驚，又點會驚環保署個CCTV吖！
講到呢度，一定要數埋市區非法棄置建築廢料呢一筆。環保署一方面提高「泥頭費」收費，另一方面又唔增加巡查，結果自廢武功。冇計嘞，港府搞環保一向葉公好龍，嗌口號就最耍家，真正執法就關人個關，無王管咯喎，亂象叢生又有乜出奇。