政情：舊物重用 娥姐選舉使$7100
立法會選舉候選人可以豪花逾百萬港元， 亦都有人可以選得好慳家。參加今年三月新界東立法會補選嘅候選人「娥姐」陳玉娥，向選舉事務處申報選舉開支， 整個補選娥姐曝光率唔低，但只係花費約七千一百元。選舉中獲得一千五百零四票嘅佢，平均每票唔使四元八角，分分鐘可能係每票使費最低嘅候選人。加上娥姐共獲逾六千元嘅現金捐贈，娥姐實際只使咗逾一千一百元咋。
同好多候選人一樣，娥姐喺補選中花費最多嘅係選舉廣告，使咗近六千元。不過，佢認真慳家， 宣傳物品當中包括個人照片、海報同傳單都有部分係舊物重用，睇番單據，應該係佢一六年參加立法會換屆選舉時嘅剩餘物資，似乎都幾環保噃。另外，佢共收六筆為數一千港元嘅現金捐贈，同埋一筆近三十元嘅現金捐贈，究竟呢位捐出近三十元畀娥姐嘅人士有乜特別意思要表達呢？
與任亮憲同被沒收保證金
另外，參加港島區立法會補選嘅候選人任亮憲亦已申報選舉開支。佢喺整個補選合共花費逾八十五萬元，但獲得嘅選舉捐贈只有價值約六萬元嘅服務，並無現金捐贈。雖然係花咗逾六十六萬元去做選舉廣告宣傳，但最終都只係獲得三千五百八十票，平均每票近二百四十元。而佢亦因為冇移除選擇宣傳品，被政府罰款約二千七百元。
而喺是次補選當中，娥姐同任亮憲都因為得票太低，而被沒收每人五萬港元嘅選舉保證金。