政情：葉劉張宇人互嗌「肥哥哥」「姐姐」

張自言議會中識葉劉最耐

張宇人就話早就同葉劉嘅丈夫相識，估計有機會比葉劉認識其丈夫仲要早添！而葉劉更肯定呢個說法，仲大爆結婚時就喺張宇人嘅酒樓擺酒，難怪張宇人自言，應該係議會中同葉劉認識最耐嘅人喇！

葉劉更指張宇人夠晒照顧佢，好似兩個一齊飛內地，張宇人都安排妥當同佢一齊出發喎，仲話當日因為聽張宇人話，先決定放棄出戰山頂選區補選。張宇人聽到就大呼好彩，因為現任山頂選區區議員楊哲安，將於今年內第四度做爸爸，睇嚟張宇人都好關心黨友嘅家庭壓力。

另外，張宇人又自爆前日喺立法會外嘅天橋上，見到有鼠輩橫行嘅畫面而嚇親，仲話自己驚一切動物，企喺隔籬嘅葉劉仲露出「驚驚」表情添！張宇人認為養貓係解決鼠患方法，可惜現時食肆唔准養貓。