政情：港獨自決末路區選隨時DQ
喺前年立法會選舉前，政府新增設要求候選人簽署一份「確認書」，表明擁護《基本法》同埋保證效忠香港特別行政區，而喺當年嘅換屆選舉以至早前嘅四席補選，港獨同自決派已被取消參選嘅資格（DQ），最近就連參加區議會補選都要簽確認書，選舉事務處尋晚亦話區議會選舉同立法會選舉嘅相關規定基本上相同。換言之，喺同一套遊戲規則下，港獨同自決派繼參選立法會無門後，連參選區議會都冇運行，亦可能被DQ。
前年立法會選舉時，已有五人因為主張港獨，即使當中有人曾經簽署確認書，但最終都係被DQ，而同時自決派就順利出閘。其後因為宣誓風波而導致出現立法會四席補選，香港眾志（眾志）常委周庭喺報名參加港島區補選時，因眾志主張「民主自決」，被指違背一國兩制，所以選舉主任質疑周庭唔係真心同埋真誠擁護《基本法》及效忠香港，於是被DQ參選資格。
周庭入唔到閘，意味自決派嘅立法會議員之路已行人止步，而眾志嘅副主席袁嘉蔚、秘書長黃之鋒同學聯前副秘書長岑敖暉等人就有意轉戰區議會，但可能都係此路不通，事關早喺上年年底同今年年中嘅區議會補選，已經要簽署確認書，睇嚟黃之鋒等人都危危乎喇！
唔使撞區（界刂）票 泛民最開心
身兼南區區議會同立法會嘅「雙料議員」區諾軒話，區議會係要求準候選人喺地區上長期服務，同其他選舉制度唔同，認為如果有意參選嘅人未必知自己入唔入到閘，到時就會造成唔公平，甚至將心血付諸一炬，但身兼行政會議成員、立法會同區議會嘅「三料議員」張國鈞就話，《區議會條例》一早就寫明候選人要擁護《基本法》，只係過往執法上冇咁手緊，仲認為區議會係解決民生事務，唔應該牽涉政治。
其實，喺現階段民主派喺下屆區議會選舉協調當中，本土自決派已經同班泛民出現撞區，一旦佢哋入唔到閘，班泛民可能開心都嚟唔切，事關唔使爭傷和氣，但建制派就可能愁爆，因為冇咗班本土自決派同泛民撞區（界刂）票，建制派分分鐘冇得坐收漁人之利喇！