中環出更：稱被搶手機 葉建源暗寸許智峯？
民主黨立法會議員許智峯早前因為喺立法會內強搶保安局女行政主任（EO）手機而惹到一身蟻，現時涉犯四宗罪面臨喪失議席危機。不過尋日立法會審議《撥款條例草案》時，教育界議員葉建源竟投訴「有人搶咗我電話」，唔通佢暗寸許智峯？
干擾咪高峰 莫乃光攞開手機
葉建源就涉及教育範疇嘅修正案發言時，其咪高峰出現頻密嘅「吱吱聲」，主席梁君彥就問佢身上係咪有手機，因而干擾咗咪高峰嘅運作，又提醒佢將手機攞開。不過，葉建源就連聲否認，繼續低頭調整掛喺外套上嘅咪高峰，情況當然持續冇改善喇！
但梁君彥就肯定咪高峰係受到葉建源嘅手機影響，惟葉建源仍然一臉迷惘，話佢部手機已放喺枱面。呢個時候，資訊科技界議員莫乃光就出手幫助，將葉建源放喺枱面嘅手機攞走，葉建源見狀就笑指「有人搶咗我電話喇」，疑似暗寸「峯搶手機」事件。之後，梁君彥就叫佢有疑問可向資訊科技界議員尋求解釋，為今次搶手機事件畫上句號。
卓妮