中環出更：施家殷盼燃起下一代國術興趣
香港國術總會日前舉辦兒童武術大賽，而該會嘅名譽會長施家殷亦年紀輕輕就鑽研武術，更曾刻意苦練搏擊技巧，但佢親歷多次實戰比試之後，發覺外國人不但體能佔優且對中國武術都好重視，亦樂於到華人社會拜師學藝，吸收國術長處，反觀港人對國術嘅熱情就唔及得外國人，所以佢期望藉着舉辦兒童武術大賽嘅機會，燃起下一代對國術嘅興趣。佢又話小朋友學習國術不但强身健體，若遇上侵犯或拐帶都有方法脫險。
施家殷憶述喺英國讀書時曾遇到當地學生嘅欺凌挑釁，過往佢喺香港南華會學習嘅少林功夫竟冇用，後來佢到澳洲升讀大學，就拜師學習詠春，以為憑住細密嘅拳法必能克敵制勝，但同其他武術比較就略嫌詠春嘅腳法比較弱，於是佢按師傅嘅建議學習自由搏擊，並展開連串地獄式訓練以增強體能同改進搏擊技巧，點知上到擂台較量，外國拳手施展三招兩式，佢就宣告敗北，屢戰屢敗嘅佢最終喺廿六歲放棄佢嘅武術生涯。
香港國術總會名譽會長陳香蓮帶同八歲大嘅囡囡到場觀摩，陳香蓮話國術蘊含中國文化，習武之人除咗講拳腳更要講武德，所以小朋友學國術係唔會好勇鬥狠咁話。
莊家彬擇學太極
菁英會主席莊家彬就話孩童時代喺父母安排之下學習跆拳道同柔道以鍛煉體格，但後來因專注學業，習武就中止咗，將來若有機會研習國術嘅話，佢會選擇太極，因為太極既可以調劑一下急促嘅生活節奏，亦有修心養性之效。
卓妮