香港問題天天都多，淨係泊車位僧多粥少已令駕駛人士叫苦連天。可惜吖，港產官僚出名頭大無腦、腦大生草，乜嘢公共問題都係獨沽一味徵費解決。喂，如果徵費真係萬能，不如搵個機械人坐喺度收錢算喇，使乜要納稅人出糧畀班廢官日日喺度獻世吖。
嗱，廢官代表之一嘅運房局局長陳帆尋日出席立法會財委會特別會議，席間討論到塞車問題。佢老哥話喎，私家車平均每年增長達百分之四，形容增幅驚人，趨勢唔可能持續，會積極研究管理私家車增長措施，包括財政措施，暗示可能加稅。
好明顯喇，港府想藉住增加首次汽車登記稅同調高牌費等手段遏止私家車增長，但有冇效果又係另一回事。例如電動車首次登記稅吖，港府美其名曰推動環保而豁免徵稅多年，點知波叔去年頂替鬍鬚曾上場就取消，但一個屈尾十今年又話繼續寬減兼推出「一換一」計劃。梗係啦，電動車取消豁免登記稅後，係就係銷量大減，弊在柴油私家車數量暴升，因減得加，證明政府捉蟲。所以話，家陣又打加稅主意，咪即係黔驢技窮，尤其係香港有錢人愈來愈多，加稅係咪有用，諗都諗到喇。
講真，香港塞車問題嚴重，除咗私家車數量上升，亦同泊位不足、道路基建未能配合有關。有數得計，過往十年私家車增長近五成，泊位增加不足一成，導致亂象叢生。最騎呢係港府唔去增加泊位供應，一味調高牛肉乾同咪錶收費，治標唔治本不特止，反而掀起加風，領展公屋停車場最近借頭借路加租就係鐵證，結果咪又係益咗無良商家。
再講吖，一個蘿蔔一個坑，有咁多架車就要有咁多個泊位，偏偏港府城市規劃亂晒龍，唔止降低新落成建築物車位比例，仲收番唔少市區露天停車場。至於道路基建更加唔使多講，超支延誤當食生菜，道路不敷應用咯喎，點會唔塞車呀。都未計跨境車數量六年間大增逾六成，造成塞上加塞。港府一味打劫車主荷包，簡直本末倒置。
本來呢，鼓勵市民使用公共交通工具，不失為紓緩塞車嘅方法，仲有助環保添，無奈現實係公共交通工具一樣逼爆。呢，早排港鐵先至公布去年乘客量首次超越二十億人次，至少五條路線喺早上繁忙時段超負荷，逼車慘過受罪，有能力嘅市民買車代步都係人之常情咋。
真係諗極唔明，日本、新加坡以至深圳一樣面對泊位不足嘅問題，但人哋係利用創新科技發展高空機械臂泊車技術，唯獨港產官僚懶到出汁，淨係識得徵費。見微知著，香港經濟及社會發展停滯不前有乜出奇！