政情：二號會議室加位 立會預料有衝擊？

愈多團體出席會議

身兼行管會主席嘅立法會主席梁君彥話，會議室二加位工程將於暑假進行，又解釋話係立法會啲委員會人數愈嚟愈多，又多咗團體出席表達意見，所以有需要加位喎。依家建制同民主兩派不時「冧人」入委員會爭搶主席同副主席，好似審議高鐵一地兩檢條例草案委員會咁，人數多達六十四人，多間房開會確實有需要。

但值得留意嘅係，立法會能夠容納七十位議員開會嘅，目前只有一樓嘅會議廳同二樓嘅會議室一，以往有議員喺大會期間衝擊會議廳，只能轉戰會議室一，假如日後會議室二擴建後，就可以成為「第三戰場」，咁即使有議員衝擊大會，都多間房可以「走盞」。