政情：政團評分 香港本土跌最甘
香港研究協會最新民調顯示，十五個於立法會內擁有議席嘅政團支持度評分均錄得跌幅，其中由獨立毛孟靜及重返議會一個多月范國威成立嘅香港本土，最新支持度評分為一點九七分，較上次調查大跌○點三四分，其跌幅係一眾政團中最多，研究協會話結果反映市民對多數香港政團嘅觀感轉差。
7成直選議員評分下降
是次調查於本月三日至十七日進行，成功訪問一千一百多名十八歲以上市民，以五分為最高分，一分為最低分，除咗問及受訪者對本港十多個主要政團嘅評分，另外亦就五個地區直選和區議會（第二）功能界別立法會議員進行評分，結果顯示，受訪者對議員整體工作表現只有二點三分，較上次下跌○點○三分。
議員個人評分方面，七成直選議員評分錄得跌幅，至於上月立法會補選當選嘅三名議員首次上榜，香港島嘅區諾軒評分為二點六三分，九龍西嘅鄭泳舜評分係二點四五分，新界東嘅范國威則有二點五二分，三名新任議員嘅評分排名均處於所屬選區嘅中游位置。