政情：教育爭議封口 吳克儉心繫美食遊
香港嘅教育政策不時出現爭議，由小學推行嘅基本能力評估（BCA），以至係咪全民免費考中學文憑試（DSE），都成為好多市民嘅熱話。尋日喺一個活動上見到教育局前局長吳克儉，當然問吓佢點睇喇？但佢就唔多願講，但講到近日嘅「美食遊」就講到好開心喎。
針對近期嘅教育爭議，吳克儉只係話相信佢嘅繼任人、現任局長楊潤雄同現屆政府都有智慧作出解決方案，其餘就不便評論喇！
遲吓去土耳其觀光
離開「熱廚房」快將一年，吳克儉話終於有時間去做一啲過往難以抽空參與嘅活動，譬如早前到內地「美食遊」，飽嘗中山脆肉鯇、石岐乳鴿同小欖菊花宴，又去到海南省，出席幼教交流，遲吓就打算到土耳其觀光遊覽添！
雖然多咗時間玩樂，但仍然花精力喺人力資源嘅研究，同人工智能嘅廣泛應用下，未來嘅僱員應該如何自處有關，佢話呢個係政府、企業同專業管理人員都要面對嘅重要課題。