政情：撤對沖現方案袋唔落 張宇人揚言辭行會

指商界望政府「落多啲水」

勞福局局長羅致光近日開始同商界商會代表會面，商討取消強積金對沖一事。身兼自由黨主席嘅立法會飲食界議員Tommy投訴話，取消強積金對沖最受影響嘅係一眾中、小同微企，指該黨想邀請羅致光同呢類企業會面溝通，但係被對方拒絕。佢批評羅致光只肯見商界嘅工會，但係工會代表都係大企業，炮轟對方唔肯面對小企業。佢又透露商界期望政府可「落多啲水」，但否認要求政府「永續」落水。

Tommy又話假如當局仍然拎現時嘅取消對沖方案去立法會闖關，佢只有三個可能性，第一係「轉身」唔投票；第二係投反對票後辭任行會；第三係辭任行會後投反對票，即係堅持對依家嘅方案唔收貨。但佢認為情況唔會去到咁差，指羅致光既然預料二○二二年先落實取消強積金對沖，意味最終方案會喺二○二○年左右先提交立法會，佢指政府一向樂意聆聽商界意見，有信心呢一兩年內經商討後，方案會係經過深思熟慮。

Jeffrey亦不滿當局至今未有就取消對沖方案同佢聯絡，又指政府拋出嘅現行方案，同工商界早前提出嘅建議，喺落水金額同年期都有好大分別。至於屆時喺立法會嘅投票意向，佢就再三話目前嘅方案極為初步，依家唔作評論喎。

咁啱得咁蹺，喺Jeffrey埋怨期間，勞福局副局長徐英偉（Casper）行過，仲立刻同Jeffrey約時間會面添！未知係咪想「補鑊」呢？Casper解釋，話局方係想先見商界工會代表，先再同商界政黨會面，強調唔會漏咗佢哋喎。

另外，自由黨黨魁、立法會紡織及製衣界議員鍾國斌尋晚亦喺Facebook上載一張與羅致光笑住「拗手瓜」嘅合照。鍾國斌寫明「MPF（強積金）議題上拗手瓜」，仲叫網民猜吓比試結果係點？有網民就認為羅致光笑容勉強，加上鍾國斌所站嘅位置，覺得鍾國斌能夠穩勝。