中環出更：約婦檢排兩年卿姐向陳肇始問責

公立醫院輪候時間長，樣樣都要等，如果做檢查就起碼等番三五七年。立法會前議員劉慧卿（卿姐）最近打算去預約做婦科檢查，點知排期排到二○二○年，卿姐激到話「咁你留番家（自己）用喇」，仲直接向食物及衞生局局長陳肇始「問責」添！

陳肇始尋日出席一個節目接受卿姐訪問，卿姐一嚟就問陳肇始，做咗十個月局長，管唔管得掂班醫生先？陳肇始話自己做咗三十幾年臨床工作，同醫生合作無間，認為「醫生唔使震（懾）嘅」，有乜嘢唔啱傾到啱。

卿姐又質疑依家醫療搞唔好，係咪畀班醫生控制住啊？陳肇始就逐一介紹番近期通過嘅條例，又話處理緊基層醫療健康發展。卿姐即刻話，要預防即係要檢查喇。

原來卿姐早排想預約東華東院婦女健康普查部做婦科檢查，點知要安排到二○二○年，「有冇搞錯啊，你留番家（自己）用喇」，質問局長會唔會改善情況。陳肇始亦無奈話明白輪候時間長，所以推動基層醫療時會向私營購買服務喎。

卓妮

中環出更：約婦檢排兩年 卿姐向陳肇始問責